نتخيل انك بتشرب 2 لتر من المياه... فانت كده بتحافظ علي صحتك
لكن لو شربت اكتر من 5 لتر في اقل من ساعة... فانت كده حرفيا بتحاول تنتحر
= اكتشف سنة 1938م اول حالة موت حقيقية لمريض شرب كمية كبيرة جدا من الماء في وقت قليل .......بتقول ايه؟؟....😱
انت متخيل ان المياه هي السبب الحقيقي من اسباب الحياة ممكن تكون هي نفس الطريق اللي يوصلك للموت ......؟
#خليني_ابسطهالك...🙄
نسبة السوائل بتمثل 60% من كتلة جسمناً ....
يعني تقريبا 42 لتر متوزعين في الجسم سواء داخل او خارج الخلايا...
لكن من حكمة ربنا علي عباده ان الجسم بيعمل (balance) يعني بيحافظ علي كمية السوائل عند 60% ومش بتزيد ومش بتقل...
طب لو كمية السوائل:
• زادت عن 60 % ...ايه اللي بيحصل؟؟ 🤔
--- اللي بيحصل ان الكليه بتلاحظ لزيادة دي وبتعمل فلترة لكمية معينة من السوائل علشان تخرجهم برا الجسم
• انما لو قلت عن 60 % ...ايه اللي بيحصل؟؟ 🤔
--- بيحصل تحفيز لمركز في المخ اسمه (thirst center) يعني #مركز_العطش ف بتحس انك عطشان وعايز تقوم تشرب
هتقولي طب ما الجسم بيعرف يظبط الدنيا اهو .....فين المشكلة؟؟🤔🙄
المشكلة ان الجسم الطبيعي بيحتاج في اليوم
كحد ادني : 2.5 لتر علي مدار اليوم
كحد اقصي : 5 لتر علي مدار اليوم
فلو زادت كمية المياه اكتر من كده او في وقت قليل كده بتحصل اخطر عملية في جسمك وهي (water intoxication) ومعناها #التسمم_المائي
------------
#تعالي افهمك ازاي بيحصل #التسمم_المائي🙄
------------
تعالي نتخيل كده ان الدم بجانب مكوناته الاساسية بتاعته فهو يشبه كوباية الشاي:
اللي هي بتتكون من المياه والشاي ونتخيل تلات معالق سكر
ونفترض
= المياه انها الدم
= و معلقة الشاي انها البوتاسيوم
= وثلاث معالق سكر انهم الصوديوم
------------
لما يتزود كمية كبيرة جدا من المياه علي كوباية الشاي المظبوطة دي
#هتلاحظ حاجتين....🤔
= اول حاجة: طعم الشاي هيبقي عادم .....وده معناه ان تركيز الصوديوم قل
= تاني حاجة : لون الشاي هيبقي فاتح وده مش معناه ان دمك بقي خفيف ...لأ😂...ده معناه ان تركيز البوتاسيوم كمان قل ودي حاجة خطيرة
طب هي ايه اهمية #الصوديوم و #البوتاسيوم؟؟🤔
مهمين جدا لوظايف العضلات و الأعصاب ومن غيرهم جسمنا مش هيقدر يشتغل
ولما بيحصل #نقص في الصوديوم المياه بتندفع وتدخل من الدم الي داخل الخلايا بكميات كبيرة جدا بحاجة اسمها ( الخاصية الاسموزية) وبيحصل انتفاخ وكبر في خلايا الجسم ومن ضمن الخلايا اللي بتكبر هي خلايا المخ...😱
وبتظهر اعراض صداع وترجيع وفي الحالات الخطيرة بيحصل توقف في مركز التنفس في المخ وبعد كده الشخص ده بيموت .....😱
في النهاية :
مش بقولك انك متشربش المايه ....لأ....اشرب بالكمية اللي محتاجها جسمك...
ومتحاولش انك تزود في شرب المايه زيادة عن اللازوم...لان الحاجة اللي بتزيد من حدها بتتقلب لضدها...بس كد يا مؤمن ...😍
#شير_البوست لو استفد منه
#كل_يوم_معلومة_طبية
#EgyNursology
اترك تعليقا:
